知道 BIO 考到5**個陣，真係好surprise，當初諗都無諗過，寫落paper 既答案竟然值5**。後來，我發覺 BIO 係一科要識得將知識靈活運用既科目。

    點樣睇書？

我呢家幫人補緊 BIO，發現好多學生話上堂聽唔明，書睇唔明。好多人因此驚左BIO。

     其實本書顯淺易明，你首先唔好驚佢。

想當年，本書我會由第一頁睇到最後一頁，我地既智商應該差唔到，我睇得明你地都睇得明。唔明既原因可能有兩個：

      1       你無認真思考每一句既意思

      2       你唔明某D字眼。

當你睇書時，你要確保本書每一句每一隻字你都明。例如 Photosynthesis 個課，個課有一句

首先，咩叫 anabolic process、咩係 chemical energy、咩係 organic substance? 好多人睇完就算，無認真思考個句係咪全部名詞都知點解，結果睇完以為自己明左，其實係唔明。

    小心英文句式

bio 書既英文正常黎講係唔深，但英文一般既同學，要小心理解句sentence structure，有時多左個by，轉左做 noun phrase，可能句意思已經唔同左。例如 stored carbohydrate 同 store carbohydrate。有時並非同學英文唔好，而係睇得太快，skip 左某D字眼，最後理解錯誤，甚至睇唔明條題目。

    整理知識

當你睇完課書，要整理下自己學左D咩。BIO 書已經分類得好清楚，同學可以利用課文既小標題。例如 nutrition in human 個課，抄返D 小標題同小小標題出黎

如果抄埋小小標題會更好，例如

6.7    Assimilation of food

           A.     Fates of food

           B.     Role of liver

然後問下自己每一個小標題，我地學過D咩。如果講得返出黎，代表你已經掌握哂個課D內容，否則，就揭返去個頁望下。

    做課後練習

温完個課之後，就做下書D題目，一定要有答案，可以問老師攞答案對，唔對就做黎都無意思，如果無答案，就去書局買D分類練習，如果大家想參考下買咩練習，可以睇呢篇  補充練習點評  。做練習錯左個D就睇書 / 問老師 / 上網查，然後將錯個D抄落本筆記到，等考試之前拎出黎温返。

    正確地温書  可節省時間

正常黎講

Total  3小時已經温完一課，如果你肯認認真真跟住上面D step 温，你D 根基一定好扎實，無5** 都有 5* 。根基打得好，做題目會快好多。好多人未温書 / 温得唔夠透徹就做題目，結果好多都唔識，又花左好多時間去諗，温温下就唔想温，得不償失。

    打好根基既重要性

好重要一點，睇書要由頭開始睇 (如果時間充足)，正如上面所講，第21課，

anabolic process 係第4課既野，organic substance係第3課既野，前面未温，有D字眼會唔明，即使明都明得唔夠透徹。BIO 最理想既情況係可以將每一課既內容互相聯係，呢樣亦係DSE 考既野，DSE 可能會用30課既野去考返你第5課既concept，如果你聯係唔到，答題就會失分。

   中五   

    重温舊知識  分類練習

當你升到中五，而考試範圍係全部，中四教個D點算呢？答案就係做 Past Paper。Past Paper可以上網揾，做 by topic。Past Paper 最好中五就開始做 ( 如果你想拎 Lv 5 以上 )，因為 Past Paper 應該做兩次，中六再做多一次。首先做MC。我習慣將D答案寫落另一本簿到，甘日後重做唔洗望住D答案。

    80% 錯既題目會錯多次

好重要一點，將錯個D MC 用螢光筆 highlight 佢，然後將從錯誤中學到既知識抄低佢，記得要分 topic 甘抄。多數錯個D題目，好大機會錯多一次，岩D題目，多數唔會再錯，所以從錯誤中學習係好重要，好重要，好重要。

*出处：DSE00

https://dse00.blogspot.com/2017/01/bio5starstar.html